عدد الرسائل : 254 العمر : 32 تاريخ التسجيل : 25/10/2008
موضوع: يا حبيبي ...قصدي يا اللي فْهمت يوم إنك حبيبي الجمعة نوفمبر 21, 2008 9:19 am
يا حبيبي ...قصدي يا اللي فْهمت يوم إنك حبيبي
حبيبي
قصدي يا اللي فهمت يوم إنك حبيبي عامل إيه؟ رغم إن الغدر ساكن حضن قلبك لازم اطّمّن علِيهْ قلبي صابُه البُعد لكن.. غصب عنّي لسَّه داء الضعف فِيهْ هوه ده القلب اللى سبته ويّا نارُه هوّ دا القلب اللي كان بُعدك مرارُه واللي تاه مشوارُه بَعدك.. وانطفى في الحلم ضَيُّه واللى مش هتلاقى عمرك قلب زيُّه قلب لمّا احتاج يفضفض بعد غدرك "ما ابتداش بـ"ازّاي؟" و"ليه؟ !ابتدا الأول وقال لك: عامل إيه؟
****** قلب عارفه من بدايتُه فاتح الباب للّي فايتُه قلب بانياه الجراح بس مسكون بالبراح يفتحُه لْكل الخلايق.. حتى لو منهم نهايتُه حبي ليك كان طبيعه فْ قلبي مش إحساس جديد حبي ليك .. شيء لقيته ببصمتُه جوَّه الوريد وعد صمّمناه بإيدنا..وْقلنا يبقى الصدق لونُه عمري ما اتصوّرت قلبك يكسر الوعد اللي بينَّا واللي صُنته فْ يوم يخونُه كنت خايف -من بداية القصه- من آخر فصولها هل هتبعدنا الظروف؟ هل هيفضل حبّنا مسجون بخوف؟ هل بعادنا يكون نصيبنا ولاّ هيفضّل يسيبنا؟ ....ولاّ... ولاّ كل مشهد في النهايه.. ياما جرّبتُه ف خيالي وْياما خُفتـُه !إلاّ غدرك... عمري في الفهرس ما شفتـُه خليتني انْدَه على قلوب الخلايق غصب عنّي.. وْمالتقيش كله بيقول: "انسى ناره "والسعاده الحلوه عِيشها.. وماتقاسيش مش مهم القى السعاده !!..الأهمَ ازاي اعيش
****** يا حبيبي !!قصدي يا اللي فهمت يوم إنك حبيبي كان زمان... كنت باتمنى اني اشوفك يوم في حِلمي كنت افكّر فيك دايماً قبل نومي كنت باخلع ويّا صورتك ليل همومي كنت اشوفك كل يوم الصبح
لكن جوّه ليل الوحده من غيرك.. بالاقي الكون مفيشْ كنت باسأل صورتك الحلوهْ تِجيني.. مَابْتَجِيشْ والنهارده.. بالتقي صورتك ليلاتي جايّ مادّد الإيدين بدمعك !!عقلي يرفض.. بس يصرخ قلبي: تعالى جايّ بالعذر المكرَّر تشرح.. واشتاق لك اكتر وامسح الدمعه اللي نازله..وْضحكتي في الحلم تكبر رغم إنك بعت قلبي.. وْضاع خلاص مستقبله !!بس عُذرك كنت دايماً باقبلُه غصب عنّي..كنت بافرش رمشى تاني جوَّه حلمي واحلم انّك يوم تعدِّي واصْحى من نومي والاقي دمعتك !!كات حارقه خدِّي وامّا باصحَى.. كنت افكّر لو هتيجي بجدّ.. إيه هيكون جوابي؟ هل هاثور وانصر كرامتي؟ ولاّ يبقى الردّ صمتي؟ ولاّ إيه؟ والحاجات الحلوه بينَّا.. بس هانساهُم بإيه؟ شارع الشوق اللي ياما مشيته لاجل اوصل مكانك اسمي ويَّا اسمِك على القلب اللي في النخله البعيدَه فرحتك دايماً بِخَطـِّي.. وْساعة الإيد الجديده والنهارده عقلي مدّ الإيد في قلبي وطلّع النخله وقلَعها حتى أحلامي اللي ضاعت.. بالخساره لغيري باعها حتى إسورة الإيد خلعها !!وْبرضه باشتاق لك زياده !ليه عملت القلب راهب...وانت مش قدّ العباده؟ خليتني الصبح افكّر خليتني ف نومي افكّر واوهم القلب اللي حبك إني هانسى وْللأسف !!!باشتاق لك اكتر ****** يا حبيبي !!قصدي يا اللي فْهمت يوم إنك حبيبي فاكر لمَّا كتير سألت ليه باقول كل الأسامي إلاّ إسمك؟ كنت باسكت.. عارف ليه؟ كنت حاسس إن إسمك.. فوق ما يتحمِّل لساني كنت حاسس إن إسمك لو نطقته لوحدي اكون إنسان أناني وانت عارف.. إني مش إنسان أناني كنت حاسس إن إسمك مش حروف كنت حاسس إنه درعي لو هتقتلني الظروف اسمك انت بانطقه دلوقتي عادي واحفظه دلوقتي عادي زي أسماء اللي قبلك واللي بعدك !!واللي عاشقني الساعة دي صدَّقني لو هتيجي فْ يوم لقلبي مستحيل لو يتفتح !!يبقى إيه شكل القصيده.. لو خيانتك مُفتتَح؟ :كنت دايماً بتقول لي لو هتطلب منى حاجة قول كل ما تقول يجاب والنهارده جاي باترجَّاك بسّ فْ كلمتين يا حبيبي إنت عارف انِّك خدعت وانت عارف انِّك جرحت كفَّر عن ذنب قلبك وابعد عن قلبي حبك ..لو سمحت
معقول الى بينا سحابة صيف معقول قلبى مجرد ضيف ازاى اقول الى بينى وبينها مجرد اوهام ازاى وانا معاها عرفت كل معانى الغرام ازاى انسى الحب الى اتعلمته معاه ازاى انسى كل ليالى العشق فى هواه ازاى اكمل مع قلب غيرك انا قلبى هيفضل العمر حبيبك حلم عمرى انى اكون من نصيبك
ازاى انسى كل دقة حب كانت ليه وازاى اكدب الشوق الى فى عنيه ازاى وانا مرة اعرف الحب وانا بين ايديه اكمل مشوار عمرى وانا شايف نفسى فى عنيه معقول الى بينا سحابة صيف معقول قلبى مجرد ضيف
_________________
i love 4 ever
عدد الرسائل : 173 العمر : 33 تاريخ التسجيل : 30/10/2008
موضوع: رد: يا حبيبي ...قصدي يا اللي فْهمت يوم إنك حبيبي السبت ديسمبر 13, 2008 6:13 am
بجد يا دعاء ايه الحلاوة دي كلها لالالالا مواضيعك جنان جنان بمعني كلمة جنان يعني ايه يابت الحلاوة دي كلها يابت ههههههههههههههههههههه ربنا يوفقك يا حبيبة قلبي
موضوع: يا حبيبي ...قصدي يا اللي فْهمت يوم إنك حبيبي 
الجمعة نوفمبر 21, 2008 9:19 am
